Энэхүү санамж бичгээр үйлдвэрлэл, үйлчилгээний салбарт эрчим хүчний хэмнэлтийг бий болгох, агаарын бохирдлыг бууруулах, үйлдвэрлэлд үр ашигтай техник, технологи нэвтрүүлэх, эрчим хүчний хэмнэлттэй барилга, байгууламж барих болон эрчим хүчний үр ашгийг дээшлүүлж хэмнэлт гаргасан иргэн, аж ахуйн нэгж, байгууллагад дэмжлэг үзүүлэх, урамшуулал олгох эрх зүйн тогтолцоог бий болгох зэрэг 11 чиглэлийн хүрээнд хамтран ажиллах юм.
Уг үйл ажиллагааны үеэр Эрчим хүчний зохицуулах хорооны дарга А.Тлейхан "Монгол улс жилдээ 6 тэрбум кВт.ц орчим цахилгаан эрчим хүч хэрэглэдэг үүний 10-15 хувийг хэмнэхэд л дунд зэргийн цахилгаан станцын үйлдвэрлэлийн хэмжээний хэмнэлт гарна гэсэн үг. Иймээс бид хэмнэсэн цахилгаан эрчим хүчээрээ хэрэглээгээ хаах боломжтой, нөгөө талдаа байгаль орчинд ээлтэй юм. Өнөөдөр 3000 гаруй үйлдвэр аж ахуй нэгжийг нэгтгэсэн МҮХАҮТ-тай төр хувийн хэвшлийн хамтын ажиллагааг сайжруулахаар хамтран ажиллах санамж бичигт гарын үсэг зурлаа. Цаашид хүүхэд багачуудын эрчим хүчний боловсролыг дээшлүүлэх, эрчим хүч хэмнэлтийн ухамсрыг төлөвшүүлэхийн тулд боловсролын салбартай хамтран ажиллана.” гэдгийг онцоллоо.